Það var haustdag einn árið 1987, þegar það átti að leiða kú til slátrunar á Flateyri, sem þessi sannsögulega barnabók gerist. En kýrin var ekki á þeim buxunum að ljúka sinni jarvist, hún fann á sér að eitthvað ógnvænlegt væri að gerast, sleit sig lausa og stakk sér til sunds. Á flóttanum synti hún nokkra kílómetra yfir Önundarfjörðinn og hlaut heimsathygli fyrir og hélt lífi sínu.
Þessari stórmerkilegu og ótrúlegu sögu af sundkúnni Sæunni hefur nú verið komið fyrir á barnabók. Söguna skráir Eyþór Jóvinsson bóksali á Flateyri og bókina prýðir fjöldi afar glæsilegra litmynda eftir Freydísi Kristjánsdóttur sem gæðir söguna lífi.
Bókin hlaut barnabókaverðlaun Reykjavíkur árið 2021